پروفیسر عتیق احمد صدیقی

آہ! پروفیسر عتیق احمد صدیقی
۱۷؍ دسمبر کو علی گڑھ مسلم یونیورسٹی کے شعبہ اردو کے سابق صدر پروفیسر عتیق احمد صدیقی نے داعی اجل کو لبیک کہا، اناﷲ وانا الیہ راجعون۔
مرحوم کا وطن دیوبند تھا، ان کی تعلیم دوسرے اداروں میں ہوئی تھی لیکن علی گڑھ تحریک اور سرسید احمد خاں مرحوم کے عاشق تھے، ان دونوں کی کشش انہیں علی گڑھ کھینچ لائی اور یونیورسٹی کے شعبہ اردو میں درس و تدریس کی خدمت پر مامور ہوئے اور ترقی کر کے پروفیسر، صدر شعبہ اردو اور آرٹس فیکلٹی کے ڈین ہوئے، وہ سر سید ہال کے پرووسٹ بھی رہے، سرسید اکیڈمی کے اڈیٹر کی حیثیت سے ان پر بعض سمینار کرائے، ایک سمینار میں مجھے بھی شرکت کا موقع بخشا، جامعہ اردو کے نایب شیخ الجامعہ ہوکر اسے بڑا فیض پہنچایا۔
عتیق صاحب نے سودا کے قصاید پر تحقیقی مقالہ لکھ کر ڈاکٹریٹ کی ڈگری حاصل کی تھی، ان کی مرتب کردہ اور ترجمہ کی ہوئی کتابوں کے نام یہ ہیں:
انتخابؔ مضامین سرسید، بازیافتؔ، مراسلات سرسید، انتخابؔ الٰہی بخش معروف، انتخابؔ مضامین زمین دار، اشاریہؔ تنقید، مولاناؔ سید سلیمان ندوی (سمینار میں پڑھے گئے مضامین کا مجموعہ)، اسلامؔ اور امن عالم، اسلامؔ اکیسویں صدی میں، آخری دونوں کتابیں ترجمہ ہیں۔
قدرت نے مرحوم کو درد مند دل اور دینی مزاج عطا کیا تھا، نماز جماعت سے ادا کرتے، دہلی مسجد کے امام بھی تھے، قوم کی فلاح و بہبود اور مسلمانوں کی معاشرتی اصلاح اور تعلیمی ترقی کے بڑے آرزو مند تھے، ملازمت سے سبک دوش ہونے کے بعد علم و تعلیم کے فروغ اور اصلاح معاشرت کے لیے اپنی زندگی وقف کردی تھی، رابطہ کمیٹی یو۔پی کے اہم عہدیداروں میں تھے، اس کے معاشرتی اور تعلیمی کارواں کے ساتھ ملک کے اکثر علاقوں کا دورہ کیا، ایک بار یہ کاروان جناب...