پرویز شاہدی

پرویز شاہدی
افسوس ہے کہ گزشتہ مئی میں اردو کے مشہور شاعرپرویز شاہدی کلکتہ میں انتقال کرگئے۔عمر۵۷برس کی پائی۔اصل نام محمد اکرام حسین تھا۔نسباً سید تھے، وطن پٹنہ تھااور۱۹۱۰ء میں وہیں پیدا ہوئے تھے۔ اردو، فارسی دونوں زبانوں میں ایم۔اے کیا تھا۔اسی زمانہ میں کسی جذباتی صدمہ سے دوچارہوئے اورکلکتہ میں سکونت اختیار کرلی ادھر بارہ تیرہ برس سے کلکتہ یونیورسٹی میں اردو کے لیکچرر تھے اور اُن کی وجہ سے اس شعبہ میں جیسے زندگی کی نئی روح پیداہوگئی تھی۔ شعر گوئی کا ملکہ فطری تھا،چنانچہ اُن کے ساتھیوں کابیان ہے کہ دس برس کی عمر سے ہی شعرکہنے لگے اورمشاعروں میں شرکت کرنے لگے تھے۔ انھیں قدرت تودونوں پر تھی لیکن ان کوفطری مناسبت بہ نسبت نظم کے غزل سے زیادہ تھی۔یہاں تک کہ اُن کی نظم بھی غزل کاآہنگ رکھتی تھی۔اپنی عمر اورشاعری دونوں کے عہد شباب میں ’’ترقی پسند‘‘ہوگئے تھے لیکن چونکہ طبیعت میں سلامتی اورذوق میں استواری تھی اس لیے اُن کی’’ترقی پسندی‘‘صرف افکار تک محدود رہی۔شاعری اور خصوصاً غزل کی قدیم روایات سے انھوں نے رشتہ منقطع نہیں کیا۔جتنے اچھے شاعر تھے ترنم بھی اتنا ہی ولولہ انگیز اورموثر تھا۔کلکتہ میں جب پہلی بار(غالباً ۱۹۴۹ء میں) اُن کی معرکہ آراء نظم’’تضاد‘‘
میں عدوئے قہرمانی تو رفیق شہریاری
مری زندگی جہادی تری زندگی فراری
تجھے خار و خس کی سطوت پہ یقین پائداری
مرے ہر نفس میں رقصاں مرا عزم شعلہ باری
تری آنکھیں سہمی سہمی تری فکر لرزی لرزی
مری روح بپھری بپھری کہ لگائے ضرب کاری
سنی ہے توپورے مجمع میں جوش وخروش کایہ عالم تھا کہ گویا طبل جنگ بج چکا ہے اورفوج مارچ کرنے والی ہے،یہی واقعہ میری اوراُن کی دوستی کانقطۂ آغاز تھا۔ وقت گزرنے کے ساتھ ساتھ یہ دوستی اس درجہ مستحکم اورمضبوط ہوتی چلی گئی کہ وہ میرے نہایت عزیز اورمخلص دوست ہوگئے۔جنوری۱۹۶۷ء...