فصل اول: قوانین ِحدودوقصاص کے نفاذ میں معاون اساسی اقدامات

فصل اول: قوانین ِحدودوقصاص کے نفاذ میں معاون اساسی اقدامات
اسلام محض چند عبادات کا مجموعہ نہیں کہ جن کی بجا آوری پر اخروی کامیابی کا دارومدار ہے ،بلکہ اسلام اپنے ہمہ گیر قوانین حیات اور احکام زندگی کی رو سے ایک مکمل دین ہے۔ یہ ایک ایسا کامل دین ہے جس میں انسان کی سماجی، تمدنی، تاریخی،معاشی، فکری، اخلاقی ،تعلیمی،دفاعی اور قانونی زندگی کی تمام جہات کو مضبوط بنیادوں پر استوار کرنے کے اصول پائے جاتے ہیں۔ تمام شعبہ ہائے حیات میں ان مختلف اصولوں کو نافذ کرنے اور ان کو بہتر انداز سے عمل میں لانے کے لیے ایک ریاست کا وجود ناگزیر ہے۔ اسلامی ریاست کے قیام کے بعد ہی زندگی کے اجتماعی گوشوں میں ان اصولوں کو آزمایا جا سکتا ہے اور ان سے بہترین نتائج اخذ کیے جاسکتے ہیں۔اسلام اور ریاست لازم و ملزوم ہیں۔ یہ ایک دوسرے سے اس طرح وابستہ ہیں کہ اگر ریاست اور حکومت اسلام سے علیحدہ ہوجائے تو وہ ظلم و زیادتی اور ناانصافی کا ذریعہ بن جاتی ہے اور نتیجتاً چنگزیت رونماہوتی ہے ۔ اگر اسلام اقتدار کے بغیر ہو تو اس کے ایک حصہ پر عمل ممکن نہیں رہتا اور اسلام محض عقائد و عبادات کامجموعہ رہ جاتا ہے ۔ رسول اللہ ﷺنےاسلامی ریاست اور اس کے حاکم (سربراہ )کے حوالے سے ارشاد فرمایا
"اَلْاِسْلَامُ وَالسُّلْطَانُ اَخَوَانِ تَوْأَمَانِ لَا یَصْلُحُ وَاحِدٌ مِّنْھُمَا اِلَّا بِصَاحِبِہ فَالْاِسْلَامُ اُسٌّ وَالسُّلْطَانُ حَارِسٌ وَّمَا لَا اُسَّ لَہُ یھَدِمٌ وَّمَا لَا حَارِسَ لَہ ضَائِعٌ " 315
" اسلام اور اقتدار دو جڑواں بھائی ہیں دونوں میں سے کوئی ایک دوسرے کے بغیر درست نہیں ہو سکتا ۔ پس اسلام کی مثال ایک عمارت کی سی ہے اور حکومت گویا اس کی نگہبان ہے جس عمارت کی بنیاد نہ ہو وہ گرجاتی ہے اور جس کا نگہبان نہ ہو وہ لوٹ...