ابوالکلام آزاد کے افکار عصری تناظر میں: (1958ء 1886ء)

آپ نے قلمی جد و جہد میں بھر پور کردار ادا کیا۔ آپ ایسے مجاہد تھے جس کی مثال دور دور تک نظر نہیں آتی ۔ آپ جید عالم تھے۔ آپ نے صحافت کا قبلہ درست کرنے میں اہم کردار ادا کیا۔ آپ شعلہ بیان خطیب تھے۔ انگریز کے ہندوستان سے رخصت ہو جانے کے بعد آپ ہندوستان کے پہلے وزیر تعلیم مقرر ہوئے ۔” ترجمان القرآن“، "تذکرہ" اور "خبار خاطر" آپ کی عمدہ ترین تخلیقات ہیں۔ ادبی ماہرین نے اپنے فن پاروں کو سجانے کے لیے جو ہنر آزمائے ہیں اُن سے نثر میں نیا رنگ ابھر کر آیا ہے ۔ ایسا ہی رنگ ابو الکلام آزاد کی نثر میں بھی دیکھنے کو ملتا ہے۔ آپ نے ”غبار خاطر“ لکھ کر نثر کو جو رنگ و آہنگ عطا کیا وہ بالکل نیا تھا اور اس سے پہلے اس رنگ کی جھلک بھی نظروں سے نہ گزری تھی۔ آپ نے کبھی فلسفی ہونے پر زور نہ دیا اور نہ ہی خود کو نظریہ ساز مفکر قرار دیا مگر یہ ضرور ہے کہ آپ نے نئے ذہن کی ترویج میں قوم کو نیا راستہ ضرور دکھایا۔ اس سے ظاہر ہوتا ہے کو قدرت نے آپ کو جو بصیرت عطا کی تھی وہ سمجھنے بوجھنے کے زیور سے آراستہ تھی۔
ابو الکلام آزاد کے علم و شخصیت نے ہندوستان میں جدید اسلام کی تشکیل کے لیے سرسید
احمد خاں اور اقبال کا انداز اختیار کیا۔ آپ نے 1912ء میں کلکتہ سے " الہلال " جاری کیا۔ اس مجلہ نے صحافت کی دنیا میں نہ صرف نام کمایا بلکہ سند و تصدیق کا درجہ حاصل کیا۔ جہاں تک اقبال اور مولانا ابوالکلام آزاد کے ذہنی رشتوں کی بات ہے تو ان میں کئی جگہ مماثلت پائی جاتی ہے۔ اقبال کے خطوط میں بھی مولانا کا ذکر نظر آتا ہے...