سکندر علی وجدؔ

آہ! سکندر علی وجد
(عبدالرحمن پرواز اصلاحی)
۱۶؍ مئی ۱۹۸۳؁ء کو اردو کے مشہور شاعر سکندر علی وجد کا انتقال ہوگیا۔ عمر ستر سال کی تھی، وہ ۲۲؍ جنوری ۱۹۱۴؁ء کو دیجاپور ضلع اورنگ آباد میں پیدا ہوئے، ابتدائی تعلیم اورنگ آباد ہی میں ہوئی، اور وہیں ۱۹۳۰؁ء میں ان کی شاعری کا آغاز ہوا، اور اسی سال کالج میگزین ’’نورس‘‘ کے ایڈیٹر مقرر ہوگئے تھے، ۱۹۳۵؁ء میں عثمانیہ یونیورسٹی حیدرآباد دکن سے بی اے کی ڈگری لی، ۱۹۳۷؁ء میں حیدرآباد سول سروس کے امتحان مقابلہ میں کامیابی کے بعد عہدہ منصفی پر ان کا تقرر ہوا، ۱۹۵۲؁ء میں ریاست حیدرآباد کے ضلع سنگاریڈی میں ڈسٹرکٹ مجسٹریٹ بھی رہے، پھر ۱۹۵۶؁ء میں سیشن جج کے عہدے پر فائر ہوئے اور اسی سال ملک کی تنظیم جدید میں مہاراشٹر منتقل ہوئے، ۱۹۶۴؁ء میں قبل از وقت پنشن لی اور انجمن ترقی اردو مہاراشٹر کے صدر منتخب ہوئے، ۱۹۷۰؁ء میں انھیں ’’پدم شری‘‘ کا اعزاز ملا۔ ۱۹۷۲؁ء میں مہاراشٹر سے انھیں راجیہ سبھا کا ممبر بنایا گیا۔
وہ ۱۹۷۵؁ء میں مہاراشٹر اردو اکاڈمی کے نائب صدر منتخب ہوئے، غالب اکاڈمی دہلی نے ان کو ۱۹۷۷؁ء کا اکاڈمی ایوارڈ دیا، اسی سال اترپردیش اردو اکاڈمی نے ان کے مجموعہ کلام ’’بیاض مریم‘‘ پر تین ہزار کا انعام دیا، ان کی گوناگوں ادبی خدمات کی بناء پر انھیں ۱۹۸۱؁ء میں ترقی اردو بورڈ کا نائب صدر نامزد کیا گیا، وہ دارالمصنفین کے لائف ممبر بھی تھے۔
جب انھوں نے شاعری کے میدان میں قدم رکھا تو تھوڑے ہی عرصہ میں ان کی شاعری کی دھوم مچ گئی، سروجنی نائیڈو، سر عبدالقادر، خواجہ حسن نظامی، جعفر علی خان اثر، قاضی عبدالغفار اور جگر مراد آبادی نے ان کی رعنائی خیال، حسن بیان اور رفعت فکر کی دل کھول کر داد دی اور بہت جلد وہ اردو کے ممتاز شاعروں میں شمار...