اردو افسانے کے موضوعات

اردو افسانے کے موضوعات
ایک بنیادی افسانے کے لیے بنیادی عنصر اس کے موضوع پر منحصر ہے،ہمارے اردگرد بہت سے واقعات موجود ہیں جنہیں افسانے کا موضوع بنایا جا سکتا ہے۔موضوع کے لحاظ سے افسانے کی کئی اقسام ہیں۔نفسیاتی ، معاشی، معاشرتی، سیاسی مزاحمتی اور جنسی وغیرہ۔ موضوع اور اسلوب کے اعتبار سے غورکریں تو عہدِ حاضر کے افسانے میں ترقی پسندی ، جدیدیت اورمابعد جدیدیت کے موضوعات و اسلوب اور تکنیک کے واضح اثرات ملتے ہیں۔نئے افسانے کے موضوع کا کینوس یوں توبہت وسیع ہے لیکن موجودہ دور میں جن موضوعات پر بطور خاص افسانے تحریر کئے جارہے ہیں ان میں سیاسی کشمکش ، طبقاتی فرق،سماجی آویزش،معاشرتی مسائل، جہیز کا مسلہ، ازدواجی زندگی کی پیچید گیاں ، اخلاقی اقدار کی شکست و ریخت،انسانی رشتوں کا ٹوٹنا ، بھوک اور افلاس، نفسیاتی،پیچیدگیاں ، عالمی سیاست، صارفیت وغیرہ لیکن ان تمام افسانوںمیں بیشتر افسانے فرقہ واریت،کساد بازاری اور عدم تحفظ کے احساس سے متعلق ہیں۔ یہ تمام موضوعات انسانی زندگی کے اردگرد بکھرے ہوئے ہیں اور ہر انسان کسی نہ کسی صورت میں شعوری یا لا شعوری طور پر ان مسائل سے وابستہ ہے۔
تانیثیت
تانیثیت کا تعلق براہِ راست عورت اور اس کے حقوق سے ہے۔تانیثی تحریک کا بنیادی مقصد عورتوں کو مردوں کے برابرسیاسی ، سماجی ، معاشرتی، معاشی اور قانونی برابری دینا۔ تانیثی تحریک عورتوں کے لیے انصاف کی طالب ہے ، معاشرے میں رائج مختلف امتیازات کے خاتمے کا اعلان کرتی ہے۔اردو افسانے میں نمائندہ خواتین افسانہ نگاروں کے ہاں تانیثی ر جحان دیکھنے کو ملتا ہے۔ جہاں عورتیں سماجی، معاشی ، سیاسی، معاشرتی اور علاقائی مسائل پر قلم اٹھا رہی ہیں اس کے ساتھ ساتھ عورتوں کے ساتھ پیش آنے والے مسائل کو بھی قلم بند کر رہی ہیں۔اس ضمن میں غور کریں تو ذکیہ مشہدی ایک معتبر نام ہے۔ انہوں نے...