رگھو پتی سہائے فراقؔ گو رکھپوری

فراقؔ گورکھپوری
آج کل رگھوپتی سہائے فراق گورکھپوری پر بھی ماتم بپا ہے وہ اس دار فانی سے رخصت ہوئے تو اپنے ساتھ اردو شاعری کی بہت سی رعنائیاں اور جلوہ سامانیاں بھی ساتھ لیتے گئے، فانیؔ، اصغرؔ، جگرؔ اور حسرتؔ کے بعد اردو شاعری کے لال قلعہ کے تخت طاؤس پر بیٹھ کر وہی شاہجہانی کرتے رہے، زبان کی زور آوری، فن کی ہمہ گیری، احساسِ جمال کی مرقع آرائی، رومانیت اور کلاسکیت کی ہم آہنگی غزل گوئی کی آئندہ ساخت و پرداخت میں رہبری، کیفیت و حلاوت کی رنگ آمیزی اور اردو زبان کی بے پناہ محبت کی فراوانی میں وہ یگانۂ روزگار رہے، وہ خود کہہ گئے ہیں:
کچھ درد دے گیا ہوں زمانے کو اے فراقؔ
یہ سوچ کر کہ بعد میں یہ کام آئیں گے
(صباح الدین عبدالرحمن، اپریل ۱۹۸۲ء)