اے۔ ڈی اظہر

اے۔ ڈی اظہر
اے۔ ڈی اظہر(۱۹۰۰۔۱۹۷۴ئ) کا اصل نام احمد دین ہے۔ لیکن اے۔ ڈی اظہر کے نام سے ادب کی دنیا میں شہرت پائی۔ آپ سیالکوٹ کے ایک چھوٹے گائوں ڈگرخورد میں پیدا ہوئے۔ آپ اردو کے ممتاز شاعر ‘ ادیب اور ماہرِ لسانیات تھے۔ آپ ملٹری اکائونٹس میں اعلی سرکاری افسر‘ سفارتکار‘ وزیر اقتصادیات‘ رکن قومی ترانہ انتخاب کمیٹی اور ہائی کمشنر آسٹریلیاجیسے عہدوں پر فائز رہے۔ اظہر کے والد ڈی۔ جی پاکستان ٹیلی ویژن رہے۔ اظہر شروع میں شاعری سے زیادہ صرف و نحو میں دلچسپی رکھتے تھے۔ عربی‘ فارسی اور کلاسیکی ادب پر اظہر کی وسیع نظر تھی۔ آپ اردو زبان سے دلی محبت‘ فکری مسائل و تحقیقی مہمات سے گہرا شغف اور پنجاب کی زندگی اور روایات سے والہانہ عشق رکھتے تھے۔ (۲۷۳)
اظہر کے تین شعری مجموعے ’’لذتِ آوارگی‘‘ ’’گریۂ پنہاں‘‘ اور ’’احوال واقعی‘‘ شائع ہو چکے ہیں لیکن انہیں ’’لذتِ آوارگی‘‘ کی وجہ سے شہرتِ دوام ملی ۔حفیظ جالندھری اظہر کے ادبی استاد اور دوست تھے۔ وہ ’’لذتِ آوارگی‘‘ پر منظوم تبصرہ کرتے ہوئے کہتے ہیں:
دیدہ ور اظہر بزورِ بازوئے نظارگی
ہے بغلگیرِ عروس لذتِ آوارگی
عمر کے اس مرحلے میں جلوہ ھائے رنگ رنگ
فکرِ اظہر سے نظر آنے لگے یکبارگی
لذتِ آوارگی اس کو نہیں ملتی حفیظ
جس کے ہاتھوں پر لکھی ہو بندگی بے چارگی(۲۷۴)
اظہر کی تخلیقات کا دامن خود ان کے ظرف کی کشادہ اور ان کی زندگی کی طرح متنوع ہے۔ ان کی تخلیقات جدید و قدیم کا حسین امتزاج ہیں۔ اظہر نے اپنے کلام کو اپنی علمیت کے بوجھ سے گراں بار نہیں کیا بلکہ تغزل کو قائم رکھا ہے۔ اپنے شگفتہ اور دل کش اسلوب کی وجہ سے موضوع کیسا ہی کیوں نہ ہو اسے سادہ اور آسان بنا دیتے ہیں۔ نمونے کے طور پر اے ۔ڈی اظہر کے کچھ اشعار...