اسرار خودی

اقبال کا پہلا شعری مجموعہ کلام جو فارسی زبان میں منظر عام پر آیا۔ 1915ء میں لاہور سے شائع ہوا۔ پروفیسر عبد الحق نے مختصر تعارف میں لکھا ہے کہ اسرار خودی کا پورا کلام مثنوی کی صورت میں ہے۔ اسرار خودی کی وجہ سے اقبال مفکر شاعر کے طور پر تسلیم کیے گئے خودی اقبال کی شخصیت کا جزو اور
شناخت بن گئی۔ اقبال کے فلسفہ خودی میں انسانوں کی بقا کا راز مضمرہے۔ اور قوموں کی آبرومندی کا نسخہ شفا بھی خودی میں پوشیدہ ہے۔ پروفیسر عبدالحق نے خودی کے تین مراحل اطاعت ، ضبط نفس اور نیابت الٰہی کا ذکر بھی کیا ہے ۔ تمہید کے بعد دیگر ذیلی عنوانات بھی نظم کا حصہ ہیں۔اس مثنوی کا آغاز اقبال نے 1911ء میں کر دیا تھا۔ عطیہ بیگم کے نام ایک خط میں لکھتے ہیں :
”قبلہ والد صاحب نے فرمائش کی ہے کہ حضرت بو علی قلندر کے طرز پر ایک فارسی
مثنوی لکھوں ۔ اسی راہ کی مشکلات کے باوجود میں نے کام شروع کر دیا ہے “ (13)
اقبال نے کچھ اشعار بھی لکھ کر عطیہ فیضی کو بھجوائے ۔ وہ اشعار اسرار خودی میں شامل ہیں ۔ صرف یہ خط ہی اسرار خودی کی اشاعت کا باعث نہیں بلکہ اور بھی بہت سے محرکات ایسے ہوں گے جو مفکر شاعر کو اس بات پر مجبور کرتے ہوں گے کہ غلام اور غافل قوم کی بیداری کےلیے کوئی نسخہ شفاء پیش کیا جائے ۔ ڈاکٹر رفیع الدین ہاشمی لکھتے ہیں:
”محض اتنی سی بات مثنوی کا محرک نہ تھی ۔ سہ سالہ قیام یورپ، سلطنت
عثمانیہ کا بکھرتا ہوا شیرازہ ، ملت اسلامیہ کا عمومی زوال و انحطاط اور ان سب
کے نتیجے میں وہ ذہنی کرب و اضطراب ، جو کسی حد تک "شکوہ" اور " شمع و...